രാഷ്ട്രീയവത്കരിക്കുക, നമ്മെ, നാടിനെ, മക്കളെപ്പോലും....

രാഷ്ട്രീയക്കാര്‍കാണിച്ചുകൂട്ടുന്ന കൊള്ളരുതായ്മകള്‍ എന്നും വാര്‍ത്തയാണല്ലോ. "ഇതൊക്കെ രാഷ്ട്രീയക്കാരുടെ കോപ്രായ"മെന്ന് ഒരിക്കലെങ്കിലും പ്രാകാത്തവര്‍ ചുരുക്കം. ഈ പ്രശ്നത്തെക്കുറിച്ചുതനനെ നമുക്ക് ചിന്തിക്കാം....
ചോദ്യം 1. ലോകത്തിലെ ഏറ്റവും നല്ല ഭരണ വ്യവസ്ഥ ഏതാണ്?
a. രാജഭരണം
b. നാടുവാഴിത്തം/ ജന്മിത്വം
c. വിദേശാധിപത്യം
d. ഫാസിസം
i. പട്ടാള ഭരണം
e. കമ്യൂണിസം (റഷ്യന്‍‍, ചൈനീസ് ‍, വിയത്നാം മോഡല്‍)
f. മതാധിപത്യം
g. ക്യൂബ, വെനിന്‍സ്വേ‍ല മോഡല്‍ (പേരറിയില്ല)
h. അമേരിക്കന്‍ മോഡല്‍
i. ഇന്ത്യന്‍ മോഡല്‍ ജനാതിപത്യം

പ്രാകൃതകമ്യൂണിസം (നമ്മുടെ നായനാരുടെ ഭാഷയില്‍ പറഞ്ഞാല്‍, മാവേലിനാട് സങ്കല്‍പം), ഡയരക്റ്റ് ജനാതിപത്യം തുടങ്ങി ഇന്നത്തെ സമുഹത്തില്‍ പ്രായോഗികമല്ലാത്ത രീതികളും, നാലാം ലോകം, സോഷ്യലിസം (കമ്യൂണിസ്റ്റുകാരുടെ സ്വപ്നം), ദൈവലോകം, രാമരാജ്യം തുടങ്ങി എനിക്ക് ആശയ വ്യക്തത ഇല്ലാത്ത രീതികളും മുകളിലത്തെ പട്ടികയില്‍ നിന്നും ഒഴിവാക്കിയിരിക്കുകയാണ്, ക്ഷമിക്കുക.....
എന്റെ ഉത്തരം, ഇന്ത്യന്‍ മോഡല്‍ ജനാതിപത്യമെന്നാണ്. അതായത്, ഇന്നുവരെ അറിയപ്പെട്ടിട്ടുള്ളവയില്‍ വച്ച് ഏറ്റവും നല്ല ഭരണരീതിയാണ് നാം തിരഞ്ഞെടുത്തത്. ഭരണഘടനാ ശില്പികള്‍ക്ക് വണക്കം...

ചോ: എന്നിട്ടും, എന്നിട്ടും, ഈ നാടെന്താ ഇങ്ങനെ?....
ഉ: ഭരിക്കുന്ന രാഷ്ട്രീയക്കാരുടെ കുഴപ്പം, ല്ലാതെന്താ.....
ചോ: ഈ ഉത്തരം ഒരുതരം കൈകഴുകുകയല്ലേ?
ഉ: ഇവന്‍മാരെയൊക്കെ തിരഞ്ഞെടുത്ത നമ്മളെ പറഞ്ഞാല്‍ മതി...

വലിയൊരു വിഭാഗം ഇന്ത്യക്കാരുടെയും പ്രതികരണം ഇങ്ങനെയാണ്..(എന്ന് എനിക്ക് തോന്നുന്നു, തെളിവില്ല..). മലയാളികള്‍ താരതമ്യേനെ ഭേദമാണ്, സംശയമുണ്ടേല്‍ മലയാള പത്രങ്ങളും, ഇതരഭാഷാ പത്രങ്ങളും ഒന്ന് താരതമ്യപ്പെടുത്തിനോക്കിയാല്‍ മതി. എന്നാല്‍, ഇങ്ങനെ കുറ്റംപറഞ്ഞ് നമുക്ക് ഒഴിഞ്ഞുമാറാനാവുമോ? നമുക്കീ നാടിനെ നന്നാക്കണ്ടെ? അതിന് നമുക്കെന്ത് ചെയ്യാനാവും? "നല്ല" ഭരണാധികാരികളെ തിരഞ്ഞെടുക്കുകയാണോ നമ്മുടെ ചുമതല? "നല്ല ആരുമില്ല" എങ്കില്‍ എന്ത് ചെയ്യണം?

"ജനങ്ങളില്‍ നിന്ന്, ജനങ്ങള്‍ക്കുവേണ്ടി, ജനങ്ങളാല്‍" ഉള്ള സമ്പ്രതായത്തില്‍‍ ഏറ്റവും ശക്തി(power) ജനങ്ങള്‍ക്കാണെന്ന് എന്ന് നമ്മുടെ ഭരണഘടന അടിവരയിട്ടുപറയുന്നു (ചില ജഡ്ജിമാര്‍ക്ക് ഇപ്പോ മറ്റുപലതും തോന്നിത്തുടങ്ങിയിട്ടുണ്ടത്രേ). എന്നാല്‍, തീരുമാനങ്ങളെടുക്കുകയും നടപ്പിലാക്കുകയും ചെയ്യുന്ന പ്രക്രിയില്‍ ജനങ്ങള്‍ നേരിട്ടല്ല, മറിച്ച് ജനപ്രതിനിധികളിലൂടെയാണ് ഇടപെടുന്നത്. അതിനാല്‍ അതൊരു രാഷ്ട്രീയപ്രക്രിയയാണ്. മറ്റൊരുതരത്തില്‍ പറഞ്ഞാല്‍ ഈ ഭരണവ്യവസ്ഥയില്‍ സമൂഹത്തിന്റെ മുന്നോട്ടുപോക്കിനെ നിയന്ത്രിക്കുന്നത് രാഷ്ട്രീയമാണ്. ലഭ്യമായതില്‍ ഏറ്റവും നല്ലവ്യവസ്ഥ ആയതിനാല്‍ വ്യവസ്ഥയെ കുറ്റപ്പെടുത്തുന്നതിലര്‍ഥമില്ല.

പിന്നെയുള്ള പരിഹാരം, ഈ രാഷ്ട്രീയ പ്രക്രിയയെതന്നെ നന്നാക്കുക എന്നതാണ്. അതിന് ‍ സമൂഹത്തിലെ കഴിവുള്ളവര്‍, നല്ല ആശയമുള്ളവര്‍, മുഴുവനും വ്യക്തമായി ഈ രാഷ്ട്രീയപ്രക്രിയയില്‍ ഇടപെടണം. ഈ ഇടപെടലാണ് രാഷ്ട്രീയം......ഇങ്ങനെ ഇടപെടുന്നവരെല്ലാം രാഷ്ട്രീയക്കാരുമാണ്. അവര്‍ മുഴുവന്‍സമയ രാഷ്ട്രീയ പ്രവര്‍ത്തകരാകണമെന്നല്ല ഇതിനര്‍ഥം, മറിച്ച്‍ രാഷ്ട്രീയവത്കരിക്കപ്പെടണം എന്നാണ്. നാടിനെക്കുറിച്ച് താങ്കള്‍ ചിന്തിച്ചിക്കുന്നുവെങ്കില്‍, അതിനെക്കുറിച്ച് താങ്കള്‍ക്ക് ഒരുകാഴ്ച്ചപ്പാടുണ്ടെങ്കില്‍, താങ്കളും രാഷ്ട്രീയവത്കരിക്കപ്പെടണം......നമ്മുടെ ഉത്തരവാദിത്വങ്ങളില്‍ നിന്നൊളിച്ചോടിയിട്ട് മറ്റാരെയെങ്കിലും കുറ്റം പറഞ്ഞിട്ടെന്തുകാര്യം?

പറഞ്ഞുവരുന്നത്, സമൂഹത്തിന്റെ നന്മയ്ക്ക് നാം ചെയ്യേണ്ടത്, നമ്മെതന്നെ രാഷ്ട്രീയവത്കരിക്കുക എന്നതാണ്. പോര, നാടിനെതന്നെ രാഷ്ട്രീയവത്കരിക്കണം... മതിയോ? നമ്മുടെലക്ഷ്യം ഒരു നല്ല നാളെയാണെങ്കില്‍, നാളെത്തെ സമൂഹത്തിന് നല്ല പൌരന്‍മാരെ വാര്‍ത്തെടുക്കാന്‍ കഴിയണം. നേരത്തേപറഞ്ഞതുമായി ചേര്‍ത്തുവായിച്ചാല്‍, നമ്മെപ്പോലെ അവരെയും രാഷ്ട്രീയവത്കരിക്കണം, രാഷ്ട്രീയ ബോധമുള്ളവരാക്കണം. (വിദ്യാര്‍ഥിസംഘടനയില്‍ ചേര്‍ക്കണം എന്നല്ല)...അവരോട് സമൂഹത്തിലെ തീഷ്ണമായ പ്രശ്നങ്ങളെ പറ്റി സംസാരിക്കണം, എങ്ങനെ അവ പരിഹരിക്കാമെന്ന് ചര്‍ച്ചചെയ്യണം. അവരതിനെപറ്റി ചിന്തിക്കട്ടെ.......

അതിനുപകരം, ചുറ്റുംനോക്കരുതെന്ന് പറഞ്ഞ്, പ്ലാച്ചിമടയിലെ പാവങ്ങളുടെ ചങ്കുപിഴിഞ്ഞെടുത്ത കോള കുടുപ്പിച്ച്, പണമാണഖിലസാരമൂഴിയില്‍ എന്ന് പഠിപ്പിക്കുന്ന രക്ഷിതാക്കളാണ് സമൂഹത്തിന്റെ ഏറ്റവും വലിയ ശാപം... മാറുമോ, മാറ്റാനാവുമോ?

ഓര്‍ക്കുട്ട് കാണിച്ചുതരുന്നത്
നാട് നന്നാവണം എന്നാഗ്രഹിക്കുന്ന ഏതൊരാളും അതിനുള്ള വഴിയെന്തെന്ന് ചിന്തിക്കില്ലേ? അതിനെ കുറിച്ച് അയാള്‍ക്ക് ചിലകാഴ്ചപ്പാടുകളുണ്ടാവില്ലേ? ഈ കാഴ്ചപ്പാടിനെയല്ലേ അയാളുടെ രാഷ്ട്രീയ നിലപാട് എന്ന് വിശേഷിപ്പിക്കുന്നത്? ഇനി ഓര്‍ക്കട്ട് തുറന്ന്, നിങ്ങളുടെ സൂഹൃത്തുക്കളുടെ പ്രൊഫൈലുകള്‍ വായിക്കൂ... ഭൂരിപക്ഷം പേരും "നോട്ട് പൊളിറ്റിക്കല്‍" എന്ന് എഴുതിയിട്ടില്ലേ? എന്താ അതിന്റെ അര്‍ഥം? സമൂഹത്തിന്റെ മുന്നോട്ടുപോക്കിനെ കുറിച്ച്, നാടിന്റെ ഭാവിയെക്കുറിച്ച്, അവര്‍ ചിന്തിച്ചിട്ടില്ല, താല്പര്യവുമില്ല എന്നല്ലേ? ഇതിലും മോശമായ ഒരുകാഴ്ചപ്പാട് വേറെയുണ്ടോ? [കടപ്പാട്: ദീപക് ആര്‍]